அந்த காலத்தில நாங்க – ஒரு தந்தையின் புலம்பல்

”அந்த காலத்தில நாங்க” என்று அம்மா, அப்பா சொல்லும் பொழுது எரிச்சலாக இருக்கும். அவர்கள் சொல்லுவதை காது கொடுத்து கேட்க மாட்டோம். ஆனால் பழைய நினைவுகளை இன்னோருவரிடம் பகிர்ந்து கொள்வதில் மனதிற்கு மிகவும் ஆனந்தம் கிடைக்கிறது என்று இப்பொழுதுதான் புரிகிறது.  நான் என் மகனிடம் என்ன புலம்பினேன் என்று நீங்களும் கேளுங்கள். உங்களுக்கும்  இந்த அனுபவம் இருக்கும் என்று நினைக்கிறேன்.

அந்த காலத்தில நாங்க கிட்டிப்புல்லு, கோலிக்குண்டு, பம்பரம், கண்ணாமூச்சி, கிரிக்கெட் போன்ற பல வகையான விளையாட்டுக்களை விளையாடி இருக்கோம்

ஆனா இப்ப நீங்க என்னடான்னா  எப்ப பார்த்தாலும் கம்ப்யூட்டர் முன்னாடி உட்காந்து கொண்டு கம்ப்யூட்டர் கேம்ஸ் மட்டும் ஆடிக்கிட்டு  இருக்கிங்க.

அந்த காலத்தில நாங்க சினிமா தியேட்டருக்கு போனா டிக்கெட், தீனி, சைக்கிள் டோக்கன் எல்லாவிற்கும் சேர்த்து அஞ்சு ரூபாய்க்கு மேல ஆகாது. பொங்கல், தீபாவளின்னு எல்லா பண்டிகளிலும் ரிலிசான அன்றைக்கே பார்த்து விடுவோம்.  தீபாவளி அன்று மேட்னி ஷோ மதியம் இரண்டு மணிக்கு ஆரம்பிக்கும். நாங்க பனிரெண்டுக்கே போய் தியேட்டர் வாசலில் நிற்க ஆரம்பித்து அடித்து பிடித்து கூட்டத்தில் நசுங்கி வியர்வை வழிய தியேட்டருக்குள் உள்ளே நுழைவோம்.

ஆனா இப்ப நீங்க என்னடான்னா  ஆன்லைனிலே டிக்கெட்டை ரூபாய்  நூற்று ஐம்பதிற்கு புக் பண்ணி சட்டை அழுக்கு படாம சினிமா ஆரம்பிப்பதற்கு  ஐந்து நிமிடம் முன்னர்  போகிறீர்கள். பாப்கார்ன், ஐஸ்கீரீம் என்று இன்னும் இருநூறு ரூபாய் செலவு செய்கிறீர்கள்.

அந்த காலத்தில நாங்க பொங்கல்ல பானையில பொங்க வைச்சு நாங்க கரும்பு கட்டு கட்டாக சுவைத்து இருக்கோம். வெய்யில் காலத்திலே நுங்கு, சேமியா ஐஸ், சாப்பிட்டு இருக்கோம். கல் கோனா, கமர்கட்டு, மிக்ஸர், மணப்பாறை முறுக்கு என,  பல திண்பண்டங்களை சாப்பிட்டு இருக்கோம்

ஆனா இப்ப நீங்க என்னடான்னா பொங்கல்ல கரும்பை சாப்பிட்டதே கிடையாது. குக்கர்ல வைக்கிற பொங்கலைதான் சாப்பிட்டு இருக்கிங்க. தினமும் ஜங்க் புட், சிப்ஸ், மாகி, நூடில்ஸ், பர்க்கர், சாப்பிடுறீங்க.

அந்த காலத்தில எங்க அப்பா தீபாவளி பண்டிகையிலே பேண்ட், சட்டைத்துணி ஒரே கலரிலே இரண்டு மீட்டர் வாங்கி வருவார். அதிலதான் நாங்க பேண்ட், சட்டை தைத்துக்கொள்வோம். காலேஜ் வரை நாங்கள் செருப்பு அணிந்துதான் சென்று இருக்கிறோம். ஷு அணிந்ததே இல்லை.

ஆனா இப்ப நீங்க என்னடான்னா எல்.கே.ஜீலே ஜீன்ஸ், டீ ஷ்ர்ட், காலில் லிபர்டி ஷு போட்டுட்டுகிட்டுப் போறிங்க

அந்த காலத்தில நாங்க படிக்கும்பொழுது பிரஷர் அதிகம் இல்லை. காலேஜ் வரை அதிக சுமையில்லை. படிப்பு எளிதாக இருந்தது.

ஆனா இப்ப நீங்க நாங்க காலேஜ்ஜில படிச்சதை நீங்க எட்டாம் வகுப்பிலே படிச்சிடுறீங்க. அதிக பிரஷர். படிப்பு கடினமாக இருக்கிறது.

நீங்கள்  பலவற்றை இழந்து இருக்கிறீகள். நிறைய கிடைத்தும் இருக்கிறது. உங்களை பார்த்து பரிதாப்படுவதா, அல்லது சந்தோப்படுவதா. என்று தெரியவில்லை..